Luke 24

Yeisu yana towolouyo

(Madiu 28:1-10; Maki 16:1-8; Yoni 20:1-10)

1Ainaena iꞌahubenauyo neta wiki ana ahubena mugamugaina malatomtomwai waiwaihiuwowa woloiwa hiꞌaꞌabinonovaiwa hivai ta hilalawedi magaiyai. 2Hilaoma ta hiꞌitayaꞌo magaiwa ana gudu gaimawa bada hiveꞌi wahiyenaꞌo. 3Eeta magaiwa holanai hiluluwune, na hesi Yeisu taunawa nigele hiyaꞌita.

4Ainaena magaiwa ainai mayadi nuwayababa himiya ta hiꞌitaꞌita behabehauhi, na hauga habuluna ainai towatowaho bwau adi aleꞌo namanamalina na masemaseledi himahalava ta vahalidiyai hitowotowolo.

5Waiwaihiuwowa towatowahowowa hiꞌitadi ta himeheuhi, ainaena hitalupwagogo baleꞌuwai, na towatowahowowa hiwalo, ‘Hava vehabana mwalomwalowoidi yadi tupwai towaho mayawahina ambehabehaeine? 6Iya nigele teinai, bada itowolouyoꞌo, na hesi yana walo alimiyai amnuwaꞌavivini mugai Galili ainai baidamiu ammiyamiya, haugana iwalo, 7“Yau Towaho Moihagu mata tauyababao nimadiyai himwauwigau, ta aiwa lagalagana ainai hitutuye patugau, na ahubena tonugana ainai mwalowoiyena yatowolouyoma”.’

8Waiwaihiuwowa walo teina hinuwatuwuidi, 9ainaena magaiwa hilaugabaei ta hiwuyo Yeisu ana taumulitao hitau 11 maꞌadi geluwo aidiyai, ta hiwalo mahalava hava dova magaiwa ainai imamahalavane.

10Tauꞌaubabadao neta Meli Magidalaena yo Yowana yo Meli iya Yemesa hinana, yo hinage tupwadi waiwaihiu baidadiyao, Yeisu yana towolouyo vehabana ana taumulitao hiwawalo aulidine, 11na hesi Yeisu ana taumulitaone waiwaihiuwowa yadi walone nigele hiyayemidiyei, yadi nuwatuwu ebeha bada hiꞌaꞌabitalawahi.

Towatowaho hitau bwau yadi velobaloba Yeisu baidadi

(Maki 16:12-13)

13Ahubena ehebonane ainai Yeisu ana taumulitao bwau hilaulau ehebo dalava ainai, yehana Emeusa. Dalavanane ana daodao Yelusalem ainaena dova mahana hawahawagana bwau ainai tamahalava. 14Hitaubwauwone hilaulau na yodi hiꞌauꞌaubabada ginauliwowa Yeisu ainai himamahalavawa vehabadi. 15Hiꞌauꞌaubabada na hilaulau, eena Yeisu aidiyai iwutu mahalava ta baidadi hilaulau. 16Yeisu bada hiꞌitayaꞌo, na hesi nigele hiyaꞌatai.

17Ainaena hitau bwauwa ipanivilaedi, iwalo, ‘Ginauli yehana vehabana amlaulau auꞌaubabadane?’

Na hiya aluwagavaiyena mayadi nuwayababa hitowolo benali. 18Ta ana geluwa yehana Kaliyopasa iwalo Yeisu ainai, iwalo, ‘Nuwana owa taumana teya Yelusalem holanai ta nigele uyahanapui hava imamahalavane ahubena tonuga hiꞌoviꞌo ainai, awa?’

19Yeisu ipanivilaedi iwalo, ‘Ginauli yehana?’

Na hiya hiwalo, ‘Ginauliwone Yeisu Nasaleti towahona ainai imamahalavane vehabadi. Towahone teina ibom tauwalo mahalava, yo Yaubada na tomowa mehediyai yana walowo yo hinage yana paihowao wahiwahiyaladi. 20Na yama taupwaoli babadadiyao yo yama taumugaiwo towahonane hiloinaei yana mwalowoi vehabana na mulitai tauꞌalehao hitutuye patune aiwa lagalaga ainai, 21na ayemidiyei ebeha ibom mata ai Isileli ilivahigai. Ginauli teina ahubena bwau hiꞌoviꞌo aidiyai himahalava na wau ahubena tonugana. 22Na tupwadi waiwaihiu alimaiyena nuwamai hiꞌabiye pwanopwano, wuwuna wau malatomtom habuluna hilau magaiyai, 23ta Yeisu tauna nigele hiyaꞌita, na hilau gwaipile ta hava dova Yaubada yana tausagenawasao yadi walo hiwalo mahalava alimaiyai ebeha bada itowolouyoꞌo. 24Hinage dova tupwadi alimaiyena hilau magaiyai ta hiꞌita dova waiwaihiuwowa yadi walomahalavawa na hesi Yeisu nigele hiyaꞌita.’

25Ainaena Yeisu aidiyai iwalo, ‘Yauyaulemiu, wuwuna nigele mugai tauwalo mahalavao yadi walowo amyayemidiyedi. 26Na am hanapui ebeha Besinana towahona teina muyaone ilobaidi ta ainaena abo yana wasawasa ainai iluwu.’ 27Abo ivetuwuni ta aidiyai ilivalivahi hava dova Buki Veꞌahihi yana walomahalava iya vehabana. Mosese yo tauwalo mahalavao yadi Bukiwo aidiyena ivetuwuni na Buki Veꞌahihi maudoina iveꞌovi, ta ebe ainaena hanapu hilobai.

28Eena dalava ainai hilaulauwa bada vahalinai himamahalava ta Yeisu aidiyai iwalo, ‘Ammiyamiya na yalalau’. 29Ta hiya hiwalo, ‘Nigele! Havena ulaulau, teinai taꞌeno, wuwuna bada iboniꞌo.’ Ainaena italam ta iluwu yadi vadai.

30Yadi hauga ai ainai Yeisu beledi ivai, ta vehabana iꞌawanoi yo iꞌawa yauwedo Yaubada ainai, na mulitai iꞌabitomwahi ta imomohedine. 31Tenem ainai mehedi imasele ta Yeisu abo hiꞌaꞌataine, na hesi aidiyena isasawaline. 32Ainaena hitau bwauwa hiꞌaubabada, hiwalo, ‘Moiha haugana talaolaoma na iꞌauꞌaubabada yo Buki Veꞌahihi ilivalivahi alidai ada lausawahiwone vagadi dova aiwa atedai iꞌalaꞌalahi’.

33Eeta hitowolo mwayamwayau hilau Yelusalem, na nemai adi geluwowa hitau 11 hilobaidi yo tupwadi adi geluwo baidadiyao himiyamiya, 34na Yeisu vehabana hiꞌauꞌaubabada, hiwalo, ‘Saimoni bada Badane iꞌitayaꞌo, mwalowoiyena itowolouyoꞌo’. 35Eena hitau bwauwa hinage hiꞌaubabadaei hava dova amwahai aidiyai imamahalavane, yo hinage haugana Yeisu beledi iꞌabi tomwahi na imohedi ta ainaena abo hiꞌaꞌataine.

Yeisu imahalava ana taumulitao aidiyai

(Madiu 28:16-20; Maki 16:14-18; Yoni 20:19-23; Paihowa 1:6-8)

36Howola adi geluwowa aidiyai hiꞌauꞌaubabada na Yeisu imahalava ta ahiꞌahipudiyai itowotowolo, na hiꞌita ta himeheuhi, yadi nuwatuwu ehebo aluꞌaluwa. Ainaena Yeisu iwalo, aulidi, iwalo, ‘Nuwadaumwali alimiyai! 38Hava wuwuna amnuwavitai na amnuwanuwatuwu bwaune. 39Nimagu yo aegu hola amꞌitadi yo amꞌabi sawahidi, wuwuna aluꞌaluwa nigele bunumana yo nigele hilihiliyanao dova yau amꞌitagaune.’ 40Ainaena nimanawa yo aenawa iveꞌitadi.

41Tenem ainai hiyaliyaya mwalaꞌina, na hesi tupwana mayadi matauhi wuwuna nigele hiyayemidi moiha, ainaena iwalo, ‘Viha aiꞌai, ammohegau ta yaꞌai?’ 42Eeta yama tupwana ligaligana himohei, 43ta mehediyai iꞌaꞌaine.

44Ainaena iwalo aulidi iwalo, ‘Teina ginauliwone bada yaꞌaubabadaediꞌo alimiyai haugana yau baidamiu, neta hava maudoina vehabagu hilelediꞌo Mosese yana Buki ainai yo tauwalo mahalavao yadi Buki aidiyai yo hinage wali Sam aidiyai, eeta yagu walowowa ana hanapu moiha imahalavaꞌo’. 45Tenem ainai nuwadi iꞌabiye masele ta Buki Veꞌahihi hihahanapuine.

46Na aidiyai iwalo, ‘Teina dova hileleyaꞌo, iwalo: Besinana towahona mata muya yo mwalowoi ilobaidi, na ahubena tonugana ainai mwalowoiyena itowolouyo, 47na mulitai yehanaena wasa namwanamwana, yo nuwabui yo pwanoli adi nuwahamu vehabadi higuguyaei. Yadi guguyane mata hivetuwuni Yelusalem ainai na ilau taꞌiꞌili baleꞌu maudoina.

48‘Ginauli teina ainodi omiu ana tauwalo moiha. 49Na hesi yau mata Tamagu yana waloyemidiwa, neta Aluꞌaluwana yavetamalenama ta alaꞌalawowoli ewaena iꞌatuluma alimiyai, ainaena mata Yelusalem ainai amhaꞌwahaꞌwa vehabana.’

Yeisu yana hae galewai

(Maki 16:19-20; Paihowa 1:9-11)

50Yeisu yana walo iwalowedi na mulitai ana taumulitaowa ilauvaidi hilau Betani, ta nemai nimana iꞌabihini na iwalo velauwedi. 51Yana walovelaune ainai itowolo ta ihahaene galewai. 52Hiya yana abahaewa ainai hitalupwagogo yo hinoꞌonoꞌowei na mulitai mayadi yaliyaya mwalaꞌina hiwuwuyone Yelusalem. 53Hiwuyo ta vada tapwalolo holanai hauga ehebo ehebo Yaubada hiwalowalo vetuvehaeyei.